Home »

საგანმანათლებლო პროგრამაზე ჩარიცხვის პირობები

საგანმანათლებლო პროგრამაზე პირის ჩარიცხვის პირობები განისაზღვრება საგანმანათლებლო პროგრამით (შემდგომში – „პროგრამა“), რომელიც ეყრდნობა პროფესიული განათლების შესახებ საქართველოს კანონს, კანონქვემდებარე აქტებს და არსებობის შემთხვევაში, პროფესიულ საგანმანათლებლო სტანდარტს/პროფესიული საგანმანათლებლო პროგრამის ჩარჩო დოკუმენტს.

 ჩარიცხვის პროცედურა

  1. პროგრამაზე ჩარიცხვა შესაძლებელია განხორციელდეს პროფესიული ტესტირების გავლის გზით ან პროფესიული ტესტირების გავლის გარეშე;
  2. პროფესიული ტესტირებით ჩარიცხვა წარმოადგენს ვაუჩერული დაფინანსების წინაპირობას;
  3. პროფესიული ტესტირების გზით პროფესიული სტუდენტის ჩარიცხვის წესი და პროცედურები რეგულირდება ამ წესითა და საქართველოს განათლების, მეცნიერების, კულტურისა და სპორტის მინისტრის მიერ დადგენილი წესით.

 ჩარიცხვა კონკურსის შემთხვევაში, პროფესიული ტესტირების გარეშე

  1. კონკურსის შემთხვევაში უპირატესობა ენიჭებათ იმ აპლიკანტებს, რომელთაც გავლილი აქვთ ერთიანი ეროვნული გამოცდების ზოგადი უნარების გამოცდა, ხოლო შემდეგ ეტაპზე იმ აპლიკანტებს, რომლებსაც ზოგადი განათლების იმ საფეხურზე, რომელიც პროგრამაზე ჩარიცხვის წინაპირობას წარმოადგენს, აქვთ უფრო მაღალი საშუალო შეფასება (შეფასებების საშუალო არითმეტიკული);
  2. პროგრამაზე კონკურსის არსებობის შემთხვევაში, შესაბამის პროგრამაზე სწავლის მსურველებმა უნდა წარმოადგინონ ერთიანი ეროვნული გამოცდების ზოგადი უნარების გავლის დამადასტურებელი დოკუმენტი, ხოლო მისი არარსებობის შემთხვევაში – ზოგადი განათლების შესაბამისი საფეხური/დონეს გავლისას მიღებული შეფასებების ფურცელი (ნიშნების ფურცელი).
  3. ამ მუხლის მე-2 პუნქტით განსაზღვრული დოკუმენტები აკადემიის მიერ მოითხოვება მხოლოდ კონკურსის არსებობის შემთხვევაში.

  პროგრამაზე დაშვება

  1. საბაზო პროფესიულ საგანმანათლებლო პროგრამაზე დაიშვება პირი, რომელსაც აქვს სულ მცირე საბაზო ზოგადი განათლების დამადასტურებელი დოკუმენტი.
  2. პირი, რომელსაც აქვს:

ა) სულ მცირე საბაზო ზოგადი განათლების დამადასტურებელი დოკუმენტი, დაიშვება იმ საშუალო საგანმანათლებლო პროგრამაზე, რომელშიც ინტეგრირებულია ზოგადი განათლების საშუალო საფეხურის სწავლის შედეგები;

ბ) სულ მცირე სრული ზოგადი განათლების დამადასტურებელი დოკუმენტი ან მასთან გათანაბრებული დოკუმენტი, დაიშვება საშუალო პროფესიულ საგანმანათლებლო პროგრამაზე.

  1. უმაღლეს პროფესიულ საგანმანათლებლო პროგრამაზე დაიშვება პირი, რომელსაც აქვს სრული ზოგადი განათლების დამადასტურებელი დოკუმენტი ან მასთან გათანაბრებული დოკუმენტი.

დუალური მიდგომით სწავლებისათვის სტუდენტის შერჩევა და კონკურსის ჩატარება პროფესიული ტესტირების გზით ჩარიცხვის შემთხვევაში

  1. დუალური მიდგომით სწავლებისათვის სტუდენტების შერჩევა ხორციელდება სასწავლო საწარმოს მიერ, არაუგვიანეს სწავლის დაწყებიდან 6 თვისა, რაც ეფუძნება სამართლიანობისა და გამჭვირვალეობის პრინციპებს;
  2. სტუდენტთა შერჩევის პროცესის ორგანიზების მიზნით, სასწავლო საწარმო წინასწარ შეიმუშავებს სტუდენტთა შერჩევის კრიტერიუმებს და ახორციელებს შერჩევის პროცესს აკადემიასთან კოორდინაციით;
  3. სასწავლო საწარმო ვალდებულია დუალური მიდგომით სწავლებისათვის შერჩეულ სტუდენტთან გააფორმოს ხელშეკრულება და ასლი მიაწოდოს აკადემიას. ასევე, შესაძლებელია აკადემიას, სტუდენტსა და სასწავლო საწარმოს შორის სამმხრივი ხელშეკრულების გაფორმება, რაც გამორიცხავს სამმხრივი ხელშეკრულების მხარეებს შორის დამატებითი, ორმხრივი ხელშეკრულებების გაფორმების აუცილებლობას;
  4. სასწავლო საწარმო დასაბუთებული არგუმენტაციის არსებობის შემთხვევაში, უფლებამოსილია უარი განაცხადოს დუალური სწავლების პროცესში ჩართული სტუდენტის შემდგომ სწავლებაზე, რის შესახებაც ვალდებულია შეძლებისდაგვარად მოკლე ვადაში აცნობოს აკადემიას. აკადემია ვალდებულია განიხილოს სასწავლო საწარმოს არგუმენტაცია პროფესიული სტუდენტისათვის უარის თქმის შესახებ და პროფესიული სტუდენტის სტატუსის შეწყვეტის ან შეჩერების გარემოებების არ არსებობის შემთხვევაში, უზრუნველყოს პროფესიული სტუდენტის სწავლება აკადემიაში სწავლების გზით.
  5. პროფესიული ტესტირების გზით დუალურ პროგრამაზე ჩარიცხვის შემთხვევაში, ამ მუხლის დებულებები ითვლება კანონმდებლობით დადგენილი კონკურსის ჩატარების წესად, კანონმდებლობით დადგენილი ვადების გათვალისწინებით.

 საქართველოს მოქალაქეების მიერ პროგრამაზე ჩასარიცხად წარმოსადგენი დოკუმენტაცია

  1. პროგრამაზე ჩარიცხვის მსურველმა საქართველოს მოქალაქეებმა (პირადად ან მინდობილი პირის მეშვეობით) უნდა წარმოადგინონ შემდეგი დოკუმენტაცია:

ა) პირადი (არასრულწლოვანი პირის შემთხვევაში – მისი კანონიერი წარმომადგენლის) განცხადება;

ბ) შევსებული ანკეტა;

გ)  აპლიკანტის პირადობის მოწმობის ასლი (ორიგინალთან ერთად. საბუთების მიღების დასრულებისთანავე ორიგინალი დაუბრუნდება განმცხადებელს);

დ) არასრულწლოვანი პირის შემთხვევაში – მისი კანონიერი წარმომადგენლის პირადობის მოწმობის ასლი (ორიგინალთან ერთად. საბუთების მიღების დასრულებისთანავე ორიგინალი დაუბრუნდება განმცხადებელს) და დოკუმენტი, რომელიც ადასტურებს განმცხადებლის/წარმომადგენლის სათანადო უფლებამოსილებას (დაბადების მოწმობა ან მშობლის მიერ გაცემული მინდობილობა ან მეურვეობის დამადასტურებელი დოკუმენტი და სხვა);

ე) პროგრამაზე ჩარიცხვის წინაპირობების შესაბამისად – საბაზო განათლების ან უფრო მაღალი საფეხური/დონეს განათლების დამადასტურებელი დოკუმენტის ორიგინალი და ნიშნების ფურცელი (საჭიროების შემთხვევაში). ორიგინალის არარსებობის შემთხვევაში – მისი ნოტარიულად დამოწმებული ასლი;

ვ) პირმა, რომელმაც განათლება მიიღო უცხოეთში, რის საფუძველზეც ხდება ჩარიცხვა პროგრამაზე – უნდა წარმოადგინოს განათლების აღიარების დოკუმენტი;

ზ) პირმა, რომელმაც განათლება მიიღო ოკუპირებულ ტერიტორიებზე, რის საფუძველზეც ხდება ჩარიცხვა პროგრამაზე – უნდა წარმოადგინოს განათლების აღიარების დოკუმენტი;

თ) ორი ფერადი ფოტოსურათი;

ი) იმ ენის ფლობის დამადასტურებელი დოკუმენტი, რა ენაზეც ხორციელდება პროგრამა. დამადასტურებელ დოკუმენტად შეიძლება ჩაითვალოს ატესტატი, თუ პირმა სასკოლო განათლება მიიღო პროგრამის განხორციელების ენაზე.

ინგლისური ენის შემთხვევაში – საერთაშორისო დონეზე აღიარებული დოკუმენტი (ინგლისურის, როგორც მეორე უცხო ენის ტესტის ჩაბარების დოკუმენტი ან სხვა) ან აკადემიის მიერ ჩატარებული სასერტიფიკატო გამოცდის შედეგების გათვალისწინებით გაცემული დოკუმენტი.

არაქართულენოვანი პირის მიერ ქართულენოვან პროგრამაზე სწავლის შემთხვევაში – ქართული ენის მოსამზადებელი პროგრამის გავლის დოკუმენტი ან ერთიანი ეროვნული გამოცდების ქართული ენის გამოცდის ჩაბარების დოკუმენტი ან ქართულ ენაზე პროფესიული ტესტირების  გავლის დამადასტურებელი დოკუმენტი (რანჟირების დოკუმენტი)

ასეთი დოკუმენტების არარსებობისას პირს უტარდება გამოცდა აკადემიის მიერ. პირის მიერ ქართული ენის ფლობის დონის დაუდასტურებლობის შემთხვევაში, ის სწავლას იწყებს საგანმანათლებლო პროგრამის შესაბამისი დონის ქართული ენის მოდულით;

კ) თუ პირი ითხოვს შეღავათს სწავლის საფასურის გადახდისას და „სწავლის საფასურის გადახდის პირობებისა და წესის“ შესაბამისად შესაძლებელია მიენიჭოს ასეთი შეღავათი, დამატებით წარმოდგენილ უნდა იქნას იურიდიული ძალის მქონე დოკუმენტი, რაც ადასტურებს პირის იმ სტატუსს, რის გამოც მას ენიჭება შეღავათი.

უცხო ქვეყნის მოქალაქეების და მოქალაქეობის არმქონე პირთა მიერ პროგრამაზე ჩასარიცხად წარმოსადგენი დოკუმენტაცია

  1. 1საგანმანათლებლო პროგრამაზე ჩარიცხვის მსურველმა უცხო ქვეყნის მოქალაქეებმა პირადად ან წარმომადგენლის მეშვეობით უნდა წარმოადგინონ ან ელექტრონულად გამოაგზავნონ შემდეგი დოკუმენტაცია:

ა) პირადი (არასრულწლოვანი პირის შემთხვევაში-მისი კანონიერი წარმომადგენლის) განცხადება (ქართულ ან ინგლისურ ენაზე);

ბ) შევსებული ანკეტა (ქართულ ან ინგლისურ ენაზე);

გ) აპლიკანტის პასპორტის ასლის პირველი გვერდი გადათარგმნილი ქართულ ენაზე და დამოწმებული ნოტარიულად (ორიგინალი წარმოდგენილი უნდა იქნეს პირადად,  ჩარიცხვის შესახებ ოფიციალური თანხმობის გაცემის შემდეგ, კონტრაქტის გაფორმების მომენტში. კონტრაქტის გაფორმების დასრულებისთანავე ორიგინალი დაუბრუნდება განმცხადებელს);

დ) წარმომადგენლის შემთავევაში, მინდობილობის დოკუმენტი, გადათარგმნილი ქართულ ენაზე და დამოწმებული ნოტარიულად;

ე) პროგრამაზე ჩარიცხვის წინაპირობების შესაბამისად – საბაზო განათლების ან უფრო მაღალი საფეხურის/დონის განათლების დამადასტურებელი დოკუმენტი,  გადათარგმნილი ქართულ ენაზე და დამოწმებული ნოტარიულად  და განათლების აღიარების დოკუმენტის ორიგინალი;

ვ) პირმა, რომელმაც წინმსწრები განათლება მიიღო უცხოეთში, რის საფუძველზეც ხდება ჩარიცხვა პროფესიულ პროგრამაზე – უნდა წარმოადგინოს განათლების აღიარების დოკუმენტი;

ზ) ორი ფერადი ფოტოსურათი;

თ) იმ ენის ფლობის დამადასტურებელი დოკუმენტი, რა ენაზეც ხორციელდება საგანმანათლებლო პროგრამა. დამადასტურებელ დოკუმენტად შეიძლება ჩაითვალოს ატესტატი, თუ პირმა სასკოლო განათლება მიიღო პროგრამის განხორციელების ენაზე.  ინგლისური ენის შემთხვევაში – საერთაშორისო დონეზე აღიარებული დოკუმენტი (ინგლისურის, როგორც მეორე უცხო ენის ტესტის ჩაბარების დოკუმენტი ან სხვა) ან აკადემიის მიერ ჩატარებული სასერტიფიკატო გამოცდის შედეგების გათვალისწინებით გაცემული ინგლისური ენის ფლობის დამადასტურებელი დოკუმენტი. დოკუმენტის წარმოდგენა არაა სავალდებულო, თუ პირი არის იმ ქვეყნიდან, რომლის სახელმწიფო ენაა ინგლისური;

ი) არაქართულენოვანი პირის მიერ ქართულენოვან პროგრამაზე სწავლის შემთხვევაში- ქართული ენის მოსამზადებელი პროგრამის გავლის დოკუმენტი ან ერთიანი ეროვნული გამოცდების ქართული ენის გამოცდის ჩაბარების დოკუმენტი. ასეთი დოკუმენტის არარსებობისას პირს უტარდება გამოცდა აკადემიის მიერ. პირის მიერ ქართული ენის ფლობის დონის დაუდასტურებლობის შემთხვევაში, ის სწავლას იწყებს საგანმანათლებლო პროგრამის შესაბამისი დონის ქართული ენის მოდულით.

უცხო ქვეყნის მოქალაქეთა და მოქალაქეობის არმქონე პირთა რეგისტრაცია და ჩარიცხვის პროცედურები

  1. უცხო ქვეყნის მოქალაქე პირადად ან წარმომადგენლის მეშვეობით ამ წესის მე-9 მუხლის პირველი პუნქტით განსაზღვრული დოკუმენტების წარმოდგენის შემდეგ, აკადემიაში „საგანმანათლებლო პროგრამაზე სწავლის საფასურის ოდენობის განსაზღვრისა და გადახდის პირობების შესახებ“ ინსტრუქციით დადგენილი წესით, აპლიკანტი გადაიხდის სწავლის საფასურს,  რის შემდეგაც აკადემიის მიერ გაიცემა მოწვევის წერილი;
  2. მოწვევის საფუძველზე აპლიკანტს უფლება ეძლევა ვიზის მისაღებად მიმართოს შესაბამის საკონსულო დაწესებულებას;
  3. აპლიკანტი ვალდებულია აკადემიის მიერ მოწვევის წერილში განსაზღვრულ პერიოდში ჩამოვიდეს საქართველოში;
  4. ამ მუხლით განსაზღვრული პროცედურების დასრულების შემდეგ აკადემიის მიმღები კომისია იხილავს აპლიკანტის მიერ წარმოდგენილ დოკუმენტებს და პროფესიული სტუდენტის სტატუსის მინიჭების მიზნით, შუამდგომლობით მიმართავს აკადემიის დირექტორს;
  5. აკადემიის მიმღები კომისიის საოქმო გადაწყვეტილების საფუძველზე, გამოიცემა პროფესიული სტუდენტის სტატუსის მინიჭების თაობაზე დირექტორის ინდივიდუალურ-სამართლებივი აქტი და მონაცემები შეიტანება პროფესიული განათლების მართვის საინფორმაციო სისტემაში აკადემიის მიერ დადგენილი წესით.

 პროფორიენტაცია და კონსულტირება

  1. 1. პროფორიენტაციის ფარგლებში აკადემია ახორციელებს დაინტერესებულ პირთა ინფორმირებას პროგრამის შესახებ და უწევს მათ კონსულტაციას სპეციალობის არჩევისას;
  2. 2. აკადემია ორგანიზებას უწევს შეხვედრებს ზოგად საგანმანათლებლო დაწესებულებებთან და დაინტერესებულ პირებთან;
  3. 3. პროფორიენტაციის ფარგლებში აკადემია:

ა)  ახორციელებს კონსულტაციას პროფორიენტაციის კაბინეტში;

ბ) უზრუნველყოფს პირის ინფორმირებას აკადემიაში არსებული პროგრამების, მისი მიზნების, სწავლის შედეგებისა და ჩარიცხვის წინაპირობების შესახებ;

გ) პირს აწვდის ინფორმაციას პროგრამაზე რეგისტრაციისთვის წარმოსადგენი დოკუმენტაციის, ასევე სწავლის საფასურისა და პროგრამის განხორციელების თავისებურებების შესახებ;

დ)  ეხმარება პირს სარეგისტრაციო განცხადებისა და ანკეტის  შევსებაში;

ე)  მოთხოვნის შემთხვევაში, აწვდის ინფორმაციას პრაქტიკის ობიექტებისა და პარტნიორი ორგანიზაციების შესახებ. ასევე, უზრუნველყოფს ინფრასტრუქტურის დათვალიერებას, ინფორმაციის მიწოდებას დამხმარე სერვისებისა და ექსტრაკურიკულური აქტივობების შესახებ;

ვ) ახორციელებს მარკეტინგულ გამოკითხვებს.

აპლიკანტთა განაცხადებების განხილვა

  1. აპლიკანტთა განცხადებებს იღებს აკადემიის საქმისწარმოების სპეციალისტი დირექტორის ბრძანებით გამოცხადებულ ვადებში.
  2. ამ მუხლის პირველი პუნქტის საფუძველზე, მიღებულ აპლიკანტთა პირად საქმეებს საქმისწარმოების სპეციალისტი წარუდგენს აკადემიის დირექტორის ბრძანებით შექმნილ მიმღებ კომისიას;
  3. 21. აპლიკანტთ მიმღები კომისიის შემადგენლობას ამტკიცებს აკადემიის დირექტორი აკადემიის სასწავლო პროცესის მართვის სამსახურის წარდგინებით. აპლიკანტთა მიმღებ კომისიაში სავალდებულოდ შედიან: აკადემიის დირექტორი, სასწავლო პროცესის მართვის სამსახურის უფროსი, საქმისწარმოების სპეციალიტი, პროგრამის ხელმძღვანელები, სხვა პირები სასწავლო პროცესის მართვის სამსახურის უფროსის წარდგინებით;
  4. მიმღები კომისია იღებს გადაწყვეტილებას შესაბამის პროგრამაზე პირის ჩარიცხვის შესაძლებლობის ან ჩარიცხვის წინაპირობებთან შეუსაბამობის შესახებ. კომისიის მიერ უარყოფითი გადაწყვეტილების შემთხვევაში, აპლიკანტს გადაწყვეტილება ეცნობება არაუგვიანეს მომდევნო 3 (სამი) დღისა;
  5. შესაბამის პროგრამაზე აპლიკანტის ჩარიცხვის შესაძლებლობის თაობაზე, მიმღები კომისიის მიერ დადებითი გადაწყვეტილების მიღების შემთხვევაში, კომისია საოქმო გადაწყვეტილებით შუამდგომლობს დირექტორთან პირის ჩარიცხვის თაობაზე. კომისია უფლებამოსილია პირის ჩარიცხვის წინაპირობებთან შესაბამისობის დაზუსტების მიზნით, მიმართოს აკადემიის სხვა სტრუქტურულ ერთეულებსა და სპეციალისტებს. ენის კომპეტენციის დადასტურების მიზნით, უფლებამოსილია უზრუნველყოს გამოცდის ჩატარება აკადემიის მიერ დადგენილი წესით;
  6. მიმღები კომისიის მიერ შესაბამის საგანმანათლებლო პროგრამაზე ჩარიცხვის შესაძლებლობის შესახებ გადაწყვეტილების მიღების შემდეგ, აპლიკანტთა პირადი საქმეები გადაეცემა სასწავლო პროცესის მართვის სამსახურს;
  7. პროფესიული სტუდენტის სტატუსის მინიჭების შესახებ ბრძანების პროექტის მომზადებას უზრუნველყოფს სასწავლო პროცესის მართვის სამსახური.

 პროფესიული სტუდენტის ჩარიცხვა  

  1. დირექტორი გამოსცემს ინდივიდუალურ-სამართლებრივ აქტს პროფესიული სტუდენტის სტატუსის მინიჭების შესახებ;
  2. მონაცემები ჩარიცხული პროფესიული სტუდენტის შესახებ, აისახება პროფესიული განათლების მართვის საინფორმაციო სისტემაში, კანონმდებლობით და აკადემიის მიერ დადგენილი წესით;
  3. იმ პროფესიულ საგანმანათლებლო პროგრამაზე, რომლის სავალდებულო პროფესიული მოდულებით გათვალისწინებული სწავლის შედეგების 50% ან მეტი მიიღწევა რეალურ სამუშაო გარემოში, აპლიკანტის გადანაწილება ხდება ამ პროფესიულ საგანმანათლებლო პროგრამაზე აპლიკანტთა ჩასარიცხად გამოცხადებული ადგილების რაოდენობისა და დაწესებულების მიერ დადგენილი კონკურსის შედეგების გათვალისწინებით უმაღლესიდან უმდაბლესისკენ.
  4. ამ მუხლის მე-3 პუნქტით გათვალისწინებულ პროფესიულ საგანმანათლებლო პროგრამებზე აპლიკანტების განაწილების მიზნით, აკადემიის დირექტორი, ტესტირების დაწყებამდე არანაკლებ 6 სამუშაო დღით ადრე, აპლიკანტის მიერ კონკურსზე მიღებული ქულის/ქულების გათვალისწინებით ქმნის და მართვის სისტემის მიერ განსაზღვრული ფორმით მართვის სისტემას შესათანხმებლად წარუდგენს რანჟირების დოკუმენტს, რომელიც დამოწმებული უნდა იქნეს აკადემიის ბეჭდითა და დირექტორის ხელმოწერით. მართვის სისტემა რანჟირების დოკუმენტის წარდგენიდან 2 სამუშაო დღის ვადაში ამოწმებს რანჟირების დოკუმენტის სისწორეს. მართვის სისტემის თანხმობის მიღების შემთხვევაში აკადემიის დირექტორი ინდივიდუალური ადმინისტრაციულ-სამართლებრივი აქტით ამტკიცებს რანჟირების დოკუმენტს.
  5. ამ მუხლის მე-3 პუნქტით გათვალისწინებულ პროფესიულ საგანმანათლებლო პროგრამაზე მისაღებ აპლიკანტთა რაოდენობის არანაკლებ 15%-ის სპეციალური საგანმანათლებლო საჭიროების მქონე აპლიკანტთათვის განსაზღვრის შემთხვევაში, ამ პროგრამაზე სპეციალური საგანმანათლებლო საჭიროების მქონე აპლიკანტთა განაწილების მიზნით, აკადემიის დირექტორი, ტესტირების დაწყებამდე არანაკლებ 6 სამუშაო დღით ადრე, აპლიკანტების მიერ კონკურსზე მიღებული შედეგების გათვალისწინებით, მართვის სისტემის მიერ განსაზღვრული ფორმით, მართვის სისტემას წარუდგენს კონკურსში მონაწილე სპეციალური საგანმანათლებლო საჭიროების მქონე აპლიკანტთა შესახებ ინფორმაციას.
  6. რანჟირების დოკუმენტის დამტკიცების თაობაზე ადმინისტრაციულ-სამართლებრივი აქტების გამოცემისა და ტესტირების დაწყებამდე აკადემიის დირექტორის მიერ განსაზღვრული პროფესიულ საგანმანათლებლო პროგრამაზე ჩასარიცხად წარსადგენი დოკუმენტაციის ნუსხისა და წარდგენის ვადების დასრულებიდან 2 დღის ვადაში დირექტორი ინდივიდუალური ადმინისტრაციულ-სამართლებრივი აქტით რიცხავს აპლიკანტებს პროფესიულ საგანმანათლებლო პროგრამაზე და აფორმებს ხელშეკრულებას პროფესიულ სტუდენტთან/კანონიერ წარმომადგენელთან/მხარდამჭერთან, პირის პროფესიულ საგანმანათლებლო პროგრამაზე ჩარიცხვის შესახებ.
  7. ამ მუხლის მე-6 პუნქტით გათვალისწინებული წესით, აკადემიის მიერ, პროფესიულ საგანმანათლებლო პროგრამაზე იმ აპლიკანტის ჩარიცხვის შემთხვევაში, რომელმაც პროფესიულ საგანმანათლებლო პროგრამაზე სწავლის გაგრძელების უფლება მოიპოვა რუსულ, აზერბაიჯანულ ან სომხურ ენაზე ტესტირების გზით, აკადემია ამ პირთათვის პროფესიულ საგანმანათლებლო პროგრამაზე სწავლებას იწყებს ქართული ენის მოდულით.
  8. 71. ამ მუხლის მე-7 პუნქტის მიხედვით ჩარიცხულ პროფესიულ სტუდენტებს უფლება აქვთ სასწავლო პროცესის დაწყებიდან ერთი კვირის ვადაში მოითხოვონ ქართული ენის მოდულის (A2/B1) სწავლის შედეგების დადასტურება;
  9. 72. ამ მუხლის მე-71 პუნქტის მიხედვით, თუ პროფესიული სტუდენტი დაადასტურებს ქართული ენის მოდულის (A2/B1) სწავლის შედეგებს, ის სასწავლო პროცესს იწყებს პროფესიული საგანმანათლებლო პროგრამის სასწავლო გეგმის შესაბამისად ქართული ენის მოდულის (A2/B1) გავლის გარეშე;
  10. 73. ამ მუხლის მე-71 პუნქტის მიხედვით, გაცდენილი მეცადინეობების აღდგენის ორგანიზებას უზრუნველყოფს სასწავლო პროცესის მართვის სამსახური;
  11. ჩარიცხული პროფესიული სტუდენტების შესახებ მონაცემები ამ წესით გათვალისწინებული ხელშეკრულების გაფორმებიდან 3 დღის ვადაში აისახება პროფესიულ საგანმანათლებლო დაწესებულებათა მართვის საინფორმაციო სისტემაში.

სპეციალური საგანმანათლებლო საჭიროების მქონე აპლიკანტის პროფესიულ საგანმანათლებლო პროგრამაზე ჩარიცხვა 

  1. მინისტრის მიერ ინდივიდუალური ადმინისტრაციულ-სამართლებრივი აქტის გამოცემიდან 5 დღის ვადაში, აკადემიის დირექტორი ინდივიდუალური ადმინისტრაციულ-სამართლებრივი აქტით განსაზღვრავს პროფესიულ საგანმანათლებლო პროგრამაზე ჩასარიცხად წარსადგენი დოკუმენტაციის წარდგენის ვადებს;
  2. ამ მუხლის პირველი პუნქტის საფუძველზე განსაზღვრული დოკუმენტების წარდგენის შემდეგ, პროფესიულ საგანმანათლებლო პროგრამაზე სწავლის დაწყებამდე, აკადემიის დირექტორი ინდივიდუალური ადმინისტრაციულ-სამართლებრივი აქტით რიცხავს სპეციალური საგანმანათლებლო საჭიროების მქონე აპლიკანტებს პროფესიულ საგანმანათლებლო პროგრამაზე და აფორმებს ხელშეკრულებას სპეციალური საგანმანათლებლო საჭიროების მქონე აპლიკანტთან/კანონიერ წარმომადგენელთან/მხარდამჭერთან;
  3. ჩარიცხული პროფესიული სტუდენტების შესახებ მონაცემები, ამ მუხლის მე-2 პუნქტით გათვალისწინებული ხელშეკრულების გაფორმებიდან 3 დღის ვადაში, აკადემიის მიერ აისახება პროფესიული განათლების მართვის საინფორმაციო სისტემაში.