ლიანა ბიბილაშვილი სამედიცინო სფეროში ღრმა პრაქტიკული გამოცდილების მქონე პროფესიონალია, რომლის საქმიანობა უკვე სამ ათეულ წელზე მეტს ითვლის. მას მიენიჭა ბებია-ქალის კვალიფიკაცია საქართველოს ჯანდაცვის სამინისტროს თბილისის მეორე სამედიცინო სასწავლებელში სწავლის დასრულების შემდეგ და მას შემდეგ დაუღალავად ემსახურება საზოგადოებრივ ჯანდაცვას როგორც სამედიცინო დაწესებულებებში, ისე პროფესიულ განათლებაში.

მისი პროფესიული კარიერა დაიწყო ქ. თბილისის 34-ე მოზრდილთა პოლიკლინიკაში, სადაც ის მუშაობდა უბნის ექთნის პოზიციაზე. შემდგომში მან საქმიანობა განაგრძო მე-19 სამკურნალო-პროფილაქტიკურ ცენტრში, გინეკოლოგიური კაბინეტის ექთნად. განვითარებისა და პროფესიული წინსვლის მიზნით, იმ დროისთვის ერთ-ერთ წამყვან სამედიცინო დაწესებულებაში – თოფურიას სახელობის საავადმყოფოს დღენაკლთა განყოფილებაში რეანიმაციის ექთნის პოზიციაზე განაგრძო მუშაობა.

1987 წლიდან 2018 წლამდე მან თავისი პროფესიული საქმიანობა დაუკავშირა ისეთი კლინიკების სამეანო განყოფილებებს, როგორიცაა ქ. თბილისის პირველი კლინიკური საავადმყოფო, ექსპერიმენტალური სამშობიარო სახლი და ახალი სამშობიარო ცენტრი, სადაც მუშაობდა ბებია-ქალის პოზიციაზე.

სამსახურებრივი გამოცდილების პარალელურად, ლიანა ბიბილაშვილი მუდმივად ზრუნავდა პროფესიულ განვითარებაზე — გავლილი აქვს არაერთი კვალიფიკაციის ამაღლების კურსი, ტრენინგი, ესწრებოდა სემინარებსა და კონფერენციებს, როგორც სამედიცინო სფეროში, ისე საგანმანათლებლო მიმართულებით. მან მასწავლებლის კვალიფიკაცია მიიღო და დაიწყო მუშაობა წმ. ნინოს სახელობის სკოლა-ლიცეუმში შრომის უსაფრთხოების პედაგოგად.

2018 წლიდან იგი შეუერთდა საქართველოს ბიზნესის აკადემია-SBA-ს გუნდს და ასწავლის პროფესიული საგანმანათლებლო პროგრამის ფარგლებში კურსს: „სამეანო–გინეკოლოგიური პაციენტის საექთნო მართვის საფუძვლები“. 2020 წლიდან ის ასევე მუშაობს აკადემიის ჯანდაცვისა და უსაფრთხოების სამსახურის წარმომადგენლად – ექთნის პოზიციაზე. მისი ჩართულობა განსაკუთრებით მნიშვნელოვანია აკადემიური გარემოს ჯანმრთელობისა და უსაფრთხოების სტანდარტების დაცვასა და განვითარებაში.

საკითხისადმი მისი მაღალი პროფესიონალიზმი დასტურდება არაერთი საერთაშორისო თუ ეროვნული სერტიფიკატითა და მიღწევით.

ლიანა ბიბილაშვილის მრავალწლიანი შრომა, მუდმივი განვითარება და გამოცდილება აყალიბებს მას პროფესიული ჯანდაცვის სფეროსა და განათლების სისტემაში გამორჩეულ ადამიანად, ვინც იცავს პროფესიის ღირებულებებს და სხვებსაც გადასცემს მათ.